Questo sito utilizza i cookie, anche di terze parti: cliccando su 'Chiudi' o proseguendo nella navigazione acconsenti all'utilizzo dei cookie. Per maggiori informazioni o per negare il consenso a tutti o ad alcuni cookie, consulta l'informativa.

[CHIUDI]

SpettacoloSardegna | Registrati | Pubblicità | Contattaci | Newsletter

    15 luglio 2019
Home >
Login
User

Password
Recupera password 
 

RUBRICHE

 



Literedda “ispetaculare” a nostra sennora de s'etnofolk

Nostra sennora de s'etnofolk, est dae tempus meda chi ti cherio iscrìere. Sos annos, a dolu mannu, sunt passados lestros e in fines non l'apo fatu, ma como, como chi s'istadiale est lompende e fìgios tuos ant a torrare a preigare in totu s'ìsula nostra, non mi nde podo istare prus.

Nostra sennora, ti prego, faghe chi fìgios tuos, chi dae una bintena de annos ant fundadu cunfrarias de mi e la acumpangiados dae sa bateria e ornadu sos palcos tuos de ballerinas e isciallos, torrent a sighire sos cumandamentos tuos.

So preocupadu meda de s'àndala chi sunt pighende. Mi paret chi calicunu (tue de seguru as cumprèndidu chie...) siet provende a aprofundire a Nanneddu. Carchi miscredente narat ca cussa poesia de Mereu faeddet de su fàmine de sos sardos, de sa crèsia e de sa giustìtzia, ma non est gasi. l'ischimus. Faghe chi fìgios tuos sigant a la cantare a ballu, abarrende puros in su passu, pro chi sa gente non si firmet a pensare a cosas chi nde diant a istrobbare s'allirghia.

Sennora istimada, faghe chi su sonete e sa bateria, su bassu, sos isciallos e sa manos in chelu siant a fundamentu de su s'Innu de su patriotu a su feudatàriu, pro chi sos sardos nde siant orgolliosos de su ritmu diatònicu e su cantu a cruba los potzat nannigare in su sonnu de s'istadiale; faghe chi Non potho reposare siat cantada cun sas tonalidades giustas e santa Mariah Carrey nos assistat.

Sennora cara, tue chi nos as imparadu a abarrare in su surcu de sos ballos in tundu furriados a tarantella, tue chi nos as imparadu chi sa limba sarda non podet èssere faeddada ma solu cantada, tue chi ti ses moltiplicada in tastieras, lughes istroboscòpicas, bunneddeddas curtzas e fumu, non prives a figios tuos de su divertimentu. Agiudanos a fraigare turres de cuntentesa, donanos s'ispera de unu benidore iscenogràficu, ca nde tenimus bisòngiu. Donanos partzas de sardos furriados a turistas de sa cultura issoro, siast de ispiratzione pro sas ballerinas de alligalli.

Sennora istimada, isco ca a custa literedda mea tue as respostu giai, ca bides totu. Pro custu ti torro gràtzias e iseto cun fide manna un'àteru istadiale de “prendas”, “ballos”, “cantos”, “òmines”, “fèminas”, “soles”, e “lunas”.

Chi sas contaminatziones e sas collaboratziones nos acumpangent semper.

 

Tore Cubeddu


 
Copyright © Spettacolosardegna 2000 - 2019 P.IVA 02577870922  Reg. Trib. di Cagliari n. 10/13 del 22.08.2013   note legali   pubblicità
Credits
15-07-2019
http://www.sardegnaspettacolo.it/index.php?nodo=rubriche&id=45